Kynbótaárið 2018

Nú þegar sýningarárinu er lokið er gaman að líta yfir árangur Fetshrossanna á árinu. Árið 2018 voru 16 hross sýnd frá Feti. Meðalaldur þeirra var 5,2 ár og meðaltal aðaleinkunnar 8.14. Voru það sjö 5 vetra hross sem voru sýnd en sex af þeim fóru í 1. verðlaun. 14 hrossanna hlutu 1. verðlaun fyrir byggingu og 11 þeirra hlutu 1. verðlaun í aðaleinkunn. Af þessum hópi voru sex klárhross.

Gaman er að geta þess að samtals fengu hrossin frá Feti fimm sinnum 9.5 fyrir einhvern eiginlega í kynbótadómi. Kilja, 6 vetra hlaut 9.5 fyrir tölt og hægt stökk, Fenrir, 4 vetra hlaut 9.5 fyrir fegurð í reið og vilja og geðslag og Dröfn, 4 vetra hlaut 9.5 fyrir höfuð. Einnig hlaut Fenrir frá Feti 10 fyrir hægt stökk.

Dröfn frá Feti – 4 vetra Ómsdóttir hlaut 9.5 fyrir höfuð

Af níum má geta þess að í heildina fengu hrossin frá Feti 37 sinnum töluna 9 :
5x fyrir tölt
4x fyrir vilja og geðslag
3x fyrir fegurð í reið
6x fyrir háls, herðar og bóga

Landsmótið í Víðidal stendur að venju upp úr eftir sumarið og toppurinn á árinu var þegar Sigyn stóð efst í 5 vetra flokk hryssna. Hún sprakk sannarlega út á Landsmótinu og hækkaði sig um 17 kommur í aðaleinkunn. Hlaut hún sex 9: fyrir tölt, skeið, vilja og geðslag, háls og herðar, bak og lend og samræmi. Hún er jafnframt hæst dæmda hrossið frá Feti í ár. 
Sigyn hefur alltaf verið eftirtektarvert tryppi, lét vel sér í stóðinu og er mikil drottning á húsi. Hún er viljabomba, enda getuhross á öllum gangi, með úrvals tölt og skeið. Nú er hún komin í nýtt hlutverk sem ræktunarhryssa á búinu og hlökkum við mikið til að afkvæmi undan svona einstakri hryssu. 

Að Sigyn standa afar öflugar ættir en móðir hennar, Vigdís frá Feti stóð efst í flokki 6 vetra hryssna fyrir 20 árum síðan, árið 1998 með 8.36 í aðaleinkunn. Hún hlaut svo heiðursverðlaun fyrir afkvæmi árið 2006. Sigyn á níu 1. verðlauna systkini og er m.a. sammæðra Vilmundi frá Feti og Arndísi frá Feti, sem bæði hafa hlotið heiðursverðlaun fyrir afkvæmi, Vilmundur árið 2014 og Arndís nú í ár.
Faðir Sigynar, Ómur frá Kvistum tók einnig við heiðursverðlaunum á Landsmótinu nú í ár og var sjálfur efstur 5 vetra stóðhesta á Landsmóti fyrir 10 árum síðan, árið 2008 á Hellu með 8.61 í aðaleinkunn. 

Sigyn frá Feti – 5 vetra sigraði sinn flokk á Landsmóti

Tvær klárhryssur fóru síðan yfir 8.30 í aðaleinkunn, þær Kilja og Gerpla frá Feti. Báðar eru þær skefmiklar og hágengar með mikla stökkgetu. Þær verða áfram á járnum næsta vetur og stefnan tekin á hringvöllinn.

Kilja frá Feti – 6 vetra gömul hlaut 9.5 fyrir tölt

Síðastur en alls ekki sístur er Fenrir frá Feti, en óhætt er að segja að hafi slegið í gegn á Landsmótinu. Hann hlaut 8.37 í aðaleinkunn sem 4 vetra klárhestur og endaði í 2. sæti í flokknum. Hann er undan Loka frá Selfossi og Fljóð frá Feti, sem er undan Gauta frá Reykjavík og Frá frá Feti. Loki hefur sýnt það og sannað að hann er meðal fremstu klárhesta á landinu, enda búinn að sigra B-flokk á Landsmóti og blanda sér í toppbaráttuna ár eftir ár.